Во ексклузивното интервју за "Франс Фудбал", француски фудбалски магазин кој секоја година го избира најдобриот фудбалер на светот, Лео Меси, објаснил зошто не и оди на Аргентина. "Тактичкиот состав на Барселона не може да се спореди со оној на аргентинската репрезентација, кој е далеку поинфериорен." - изјавил Меси.
"Не се работи за иста поставеност на играта, а и соиграчите не се исти. Тие два тима не можете да ги споредувате по ниту еден од тие два критериуми. Ја сакам поставеноста на играта на Барса, навикнат сум на истата.
Секогаш играме напаѓачки, офанзивни сме и тоа ми се допаѓа." Сепак, најдобриот светски фудбалер не се плаши од неуспех во квалификациите за Светското првенство.
"Ќе бидеме дел од Светското првенство. Се останато би било грозно" - констатирал Меси.
22-годишниот напаѓач на Барселона докажал дека е изразито самокритичен. "Индивидуално мора да работам на тактичко усовршување. Исто така, морам да работам на подобро изведување на слободните удари. Фудбалерот никогаш не смее да запре во развојот, постојано мора да бара начини да се подобрува."
Меси исто така открил дека во следните неколку дена ќе се сретне со селекторот Диего Марадона, кој престојува во Европа, и со него отворено ќе поразговара за причините поради кои во дресот на репрезентацијата не пружа игри еднакво квалитетни на оние во каталонскиот клуб.