Менаџерот на Арсенал, Арсен Венгер, го искритикува својот колега од Манчестер Сити, Марк Хјуз поради неговиот одговор при нападот на Емануел Адебајор врз Робин ван Перси.
Фудбалската асоцијација го суспендира Адебајор на три натпревари, а францускиот стручњак беше изненаден од агресивноста на Тогоанецот кон своите поранешни фудбалери и навивачи.
"Кога отидов дома и ја гледав снимката јасно видов дека се работи за намерен старт. Ако прашате 100 луѓе што мислат за потегот 99 од нив ќе го кажат истото, а само Марк Хјуз спротивното", изјави Венгер.
"Според мое мислење Адебајор си ја заслужи казната. Бев изненаден од бесот кој го искажа против својот поранешен клуб. Мислам дека по неколку години ќе ја увиди грешката која ја стори и ќе му стане јасно колку Арсенал како клуб влијаеше врз неговиот развој како фудбалер", дополни Французинот.
Адебајор оваа казна ја доби поради бруталното однесување врз Робин ван Перси, а би можел да добие и дополнителна санкција од два натпревари поради прославувањето на погодокот пред фановите на "топчиите" кој беше оценет како намерна провокација.