Актуелниот шпански и европски првак Барселона многу брзо треба да го продолжи договорот со својот најдобар фудбалер Лионел Меси и тој ќе биде со важност до 2016 година. Каталонскиот спортски дневник Спорт не објавува детали од новиот договор, но тврди дека новата откупна клаузула за репрезентативецот на Аргентина нема да изнесува помалку од 200 милиони евра, а се шпекулира и со 250 милиони.
"Продолжувањето на договорот на Меси е голема вест како за Барселона така и за шпанскиот фудбал воопшто. Тој е најдобриот фудбалер во моментов на планетата и сигурно ќе биде од огромно значење за нас што ќе остане уште подолго на Ноу Камп", рече тренерот на Барселона, Пеп Гвардиола.
Актуелниот договор на Меси важи до 2014 година, а во моментов тој има исти примања со Тиери Анри. До мај оваа година во таа група беше и Самуел Ето, но тој во моментов е член на Интер. Со новиот договор Меси ќе биде најплатениот фудбалер на Барселона.