Најтиражаниот шпански спортски весник Марка пренесе изјава на Кристијано Роналдо која може да стави крај на спорот меѓу Реал Мадрид и Фудбалската федерација на Португалија (ФПФ). Како што е познато, двете страни се во меѓусебен конфликт околу настапот на Роналдо на бараж-дуелите со Босна и Херцеговина бидејќи Реал тврди дека тој е повреден, а во националната Федерација не веруваат на таквите тврдења.
"Не сум подготвен за настап! Се уште чувствувам болки и ми треба уште некое време одмор", рече Роналдо, кој повредата на десниот скочен зглоб ја влоши токму играјќи за репрезентацијата на Португалија на последните натпревари од квалификациите за Светското првенство во Јужна Африка.
Инаку, Реал Мадрид воопшто не сака да ја пушти својата најголема ѕвезда ниту на преглед на лекарската служба на португалската репрезентација повикувајќи се на Правилникот на ФИФА, кој, според нив, го фаворизира клубот. Од ФПФ, пак, соопштија дека го очекуваат Роналдо на денешниот тренинг и дека отсега ќе го прегледуваат докторите во репрезентацијата.
Селекторот на Португалија, Карлос Квеироз, е свесен дека без Роналдо неговиот состав ќе биде драстично ослабен, но не и без шанси имајќи предвид дека Португалците се големи фаворити во дуелот со селекцијата на БиХ.