Горан Пандев со фамилијата и пријателите се одмора во родната Струмица. Заслужува да биде во релаксирана и мирна атмосфера без проблеми и без да мисли на Клаудио Лотито. Претседателот на Лацио ја загуби битката со правдата, го загуби Пандев, а најголем губитник во целиот овој случај е Лацио. Римскиот клуб го загуби за безпари својот најдобар фудбалер. Отидоа околу 15.000.000 евра и сето тоа поради инаетот на контроверзниот Лотито и неговата десна рака Игли Таре.
А Пандев веќе ја слави својата слобода. Но нема доволно време. Имаше долга пауза и сега треба да се врати во свој стил. Да се врати во Милано, во Интер и да докаже дека го заслужува дресот на шампионот во Италија. Многумина најавуваат дека Пандев е божиќниот дар за популарниот тренер Хозе Мурињо и за сите фанови на "нероазурите". Засилување за голови за титула и за атак во Лигата на шампионите.
"Јас сум во добра форма и покрај тоа што немав настап за Лацио веќе цела есен. Подготвен сум за новите предизвици...", коментира нашиот најдобар фудбалер околу својата форма. Дека паузата не влијае многу врз неговите игри се докажа на репрезентативните натпревари на кои оваа есен Пандев даде 7 голови на 6 средби.
Во деновите на божиќните празници во Италија владее тотален молк на фудбалски план. Интер почнува да функционира од утре, а клубот заминува на куса турнеја во Саудиска Арабија. Таму се патува на 29 ноември. На "Џузепе Меаца" се подготвуваат за промоцијата на новиот фудбалер. Струмичанецот на 2 јануари се враќа за Италија и истиот ден ќе биде промовиран како нов фудбалер на Интер, а ќе почне и со тренинзите. Веќе имал разговори со новиот тренер Мурињо од кого добил честитки за неговото доаѓање во неговата екипа.
Колку само за потсетување дека Пандев во првите денови на новата 2010 година и официјално ќе стане член на Интер. Трансферот е договорен, а неговиот договор со "нероазурите" ќе трае до 2015 година за 3.000.000 евра по сезона. Со оваа цифра Пандев ќе стане најплатениот спортист на сите времиња во Македонија.