Полицијата во Џенова уапси група македонски државјани, за кои се претпоставува дека биле поврзани со италијанската мафија. Една од метите на криминалците бил португалскиот тренер на Интер, Жозе Мурињо, тврдат португалските медиуми.
Мурињо и четворица фудбалери на Аталанта од Бергамо биле постојано следени од страна на криминалците, тврдат португалските медиуми, повикувајќи се на извори од полицијата во Џенова.
Кај групата биле пронајдени документи со информации за португалскиот тренер, вклучувајќи видео снимки и фотографии направени при неговото следење, како и фотографии, односно адреса, од неговата резиденција во Милано.
Медиумите пишуваат дека Мурињо информациите ги сфатил многу сериозно, и во истиот момент заминал во полицијата со цел да обезбеди оптимални мерки за сопствена и заштита на своето семејство.