Фудбалската треска во пресрет на натпреварот Работнички – Ливерпул е се посилна како се ближи почетокот на натпреварот, закажан за в четврток на Арената Филип Втори во Скопје (почеток 20:45 часот).
Побарувачката за билетите е огромна, а од канцеларијата на „романтичарите“ не информираа дека 15-те илјади билети кои беа пуштени во слободна продажба, веќе се распродадени.
Останатата бројка се билетите резервирани за фановите на англискиот гигант, како и за спонзорите и помагателите на нашиот претставник.
Тимот на Ливерпул се очекува во Скопје да допатува денес по 12 часот, а попладнето половина час пред одржувањето на единствениот тренинг на Арената Филип Втори, закажан за 18 часот, ќе биде одржана и прес конференцијата.
Работнички пак својата средба со новинарите ќе ја имаат точно напладне во ресторанот „Македонска Софра“.
Инаку на денот на одигрување на натпреварот, в четврток вратите на Северната и Јужната трибина на Арената Филип Втори, ќе бидат отворени во 18 часот и 20 минути, а еден час пред почетокот на натпреварот односно во 19 часот и 45 минути, по препорака и инструкции на УЕФА ќе бидат затворени за влез.