За селекцијата на Словачка се некако е поврзано со нашиот најдобар фудбалер, Горан Пандев. Секогаш кога ќе бидат прашани за противникот, прво што им излегува од уста е "феноменот" од Интер. Така е и со фудбалерот на Бешикташ, Филип Холошко, кој напоменува дека добро ги познава квалитетите на Македонија, но и на Пандев кого го има гледано на ТВ екраните низ настапите за милански Интер со кој сезоната ја заврши со три титули, меѓу кои и онаа од Лигата на шампионите.
Токму Холошко се очекува да добие место во првиот тим, откако е познато дека од селекцијата на Словачка за мечот в петок отпаѓаат Роберт Витек и Станислав Шестак, двајцата први голгетери на нашиот следен противник.
"Знаеме што не чека, меѓутоа на Светското првенство покажавме дека сме квалитетна селекција и мораме да ја браниме честа. Се освен победа за нас би било катастрофа, иако треба да бидеме многу внимателни. Македонија го има Пандев. Квалитетен фудбалер, кој со само еден потег може да реши натпревар. Го гледам низ настапите во Интер, и навистина можам да кажам само пофални зборови. Но не само тој, Македонија има и други играчи кои сигурно дека ќе дадат се од себе да стигнат до поволен резултат. Ќе биде многу тешко. Ќе мораме сите да го дадеме максимумот, и со победа да ги отвориме квалификациите за Европското првенство на кое атакуваме на пласман на истото. По Македонија следува мечот со Русија. Навистина имаме тежок распоред, но што е тука е", напоменува членот на Бешикташ, Холошко, кој иако има само 26 години, веќе забележа 40 настапи за "А" селекцијата на Словачка, за која играше и на последниот Мундијал во Јужна Африка каде оваа селекција беше прогласена за најголемо изненадување елиминирајќи го светскиот шампион Италија.