Рафа Бенитез го врати Горан Пандев во тимот на Интер. Повредата на коленото се уште не е комплетно санирана, но лекарските експерти дозволија фудбалерот да биде во комбинација, и пред секоја средба за струмичанецот ќе има посебен третман. Постоело кинење на лигамент на левото колено, но место пауза од 6 недели нашиот најдобар фудбалер за 3 недели се врати во натпреварувачки ритам.
Информациите од Интер говорат дека Пандев ќе биде во комбинација и за следните дуели и дека неговото колено било супер по дуелот со Тотенхем во средата. Пандев на оваа средба од Лигата на шампионите настапи од 61. минута и не се најде во можност да постигне гол. Тимот од Милано стигна до триумф од 4:3 со што продолжува успешно да ја брани титулата во ова натпреварување.
Горан Пандев и Интер в недела на свој терен ќе се судрат со Сампдорија во дербито на колото во Серија А и на оваа средба можно е Македонецот да биде пуштен во игра од првата минута. Со посебен третман и со натпревари лекарите на Интер го враќаат во форма Пандев за кој пред два дена излезе и веста дека е повторно во мислите на Тотенхем. Англичаните нема да жалат пари за фудбалерот на Интер, кој, пак, не размислува да со оди од Милано. Таму веќе купува сопствен стан и со тоа става до знаење дека неговите планови се врзани со Интер со кој има договор до 2015 година.