На еден навивач на Манчестер Сити му се потсмева целиот Остров. По написите дека Руни би можел да се пресели во Сити, навивачот заминал да се тетовира. Но Руни се предомисли...
Нема да потпишам нов договор со Манчестер Јунајтед, заминувам! - Руни ги шокираше навивачите на Јунајтед и менаџерот Алекс Фергусон.
Сите се подготвуваа за заминувањето на англискиот репрезентативец, а се споменуваа и многу клубови. Меѓу првите се јави и богатиот градски ривал Манчестер Сити. Шеикот, сопственикот на Сити, наводно подготвил вртоглава сума пари се со цел да го направи Вејн Руни најплатениот играч во Премиер лигата. Навивачите исто така ја следеа сапуницата околу Руни, а еден отишол и малку предалеку. Момчето се занело и во моменти на напад на адреналин отишол во салон за тетовирање.
"Руни, го сакам Вејн Руни по целиот грб" - рекло момчето во салонот.
И го добил тоа што го сакал.
"Руни - легендата на Сити", му стои на грбот. И нема навивач на Островот кој сега не му се потсмева.
Руни во последен момент ја промени одлуката, го продолжи договорот со Јунајтед и ги уништи сништата на навивачите на Сити. Навивачот ќе мора да се надева дека еден ден Руни сепак ќе го облече дресот на "граѓаните" или пак ќе предизвикува засекогаш исмејување на Островот. Најверојатно, ова второто...