Доколку во следниот месец екипата на Интер продолжи со лошите резултати, Рафаел Бенитез би можел експресно да ја напушти клупата на актуелниот освојувач на Лигата на шампионите. Иако досега се одиграни само неколку средби, поразот од Тотенхем во ЛШ и ремито против Бреша како да беа причина за Морати веќе да почне да го бара наследникот на Бенитез.
Според италијанската телевизија "Медијасет", како кандидат за нов тренер на Интер се споменува поранешниот стратег на Рома, Лучано Спалети. Тој во моментов е на клупата на Зенит и со успех го предводи овој состав кон титулата во Русија.
Морати не е задоволен од играта на Интер, посебно во нападот каде што на десет средби се постигнати само 12 гола. Воедно на последните шест меча се дадени само четири и сето тоа е причина да се размислува за некакви промени. Во ситуација кога нешто не оди како треба секогаш тренерот е тој кој е прв на удар.
Сепак, доколку во следниот месец нештата се изменат, а Интер успее да се врати на првото место во Калчо, веројатно, ништо од ова нема да се случи и Бенитез ќе продолжи со одработувањето на договорот.