Напаѓачите на Милан Алесандре Пато и Филипо Инзаги ќе го пропуштат градското дерби против шампионот Интер овој викенд поради повреди заработени при победата од 3:1 над Палермо во средата. Бразилецот кој воедно беше стрелец на првиот гол го истегна мускулот на ногата, а Италијанецот го повреди коленото. Тестовите извршени вчера покажаа дека не само што ќе го пропуштат дербито туку ќе отсуствуваат и на следниот натпревар против Фиорентина. Тоа значи дека двајцата нема да се појават на терените барем до 20 ноември, што е голем пех за новиот лидер во Калчото. Освен тоа Пато ќе го пропушти и пријателскиот натпревар на Бразил со Аргентина на 17 ноември во Доха.
"Не очекува големо дерби, а двајца напаѓачи ни се повредија. Се надевам дека останатите ќе бидат фит и не ќе морам да го 'крпам' тимот на еден ваков важен меч. Пато има проблеми со мускулот, а Инзаги со коленото. Не се работи за сериозни повреди, меѓутоа ќе мора да внимаваме на нивната состојба", изјави Алегри.
Тоа значи дека за Милан на дербито во тандем ќе настапат Златан Ибрахимовиќ и Робињо, а од позадина ќе им помага Роналдињо.