На традиционалната гала церемонија одржана во Цирих, ФИФА , за прв заедно со престижниот "Франс Фудбал" им ги врачи наградите на најдобрите во изминатата година според изборот на селекторите и капитените на сите репрезентации, како и избраните новинари.
Наградата за најдобар фудбалер во 2010. година ја доби, мора да се каже, неочекувано, Лионел Меси. Аргентинецот доби предност во однос на соиграчите од Барселона и шпанската репрезентација, Чави и Иниеста.
"Искрено, не очекував да го добијам овој трофеј. Доволно ми беше што бев покрај моите двајца пријатели. Ви благодарам за аплаузите, сакам трофејот да го посветам на семејството, сите пријатели и на навивачите на Барселона и Аргентина" - изјавил Меси.
Најдобар тренер е Жозе Мурињо и тоа поради "тројната круна" освоена со Интер. Португалецот доби повеќе гласови во однос на Висенте дел Боске и Пеп Гвардиола.
Во идеалниот тим за минатата година се избрани
Касиљас,
Пике, Пујол, Лусио, Мајкон,
Иниеста, Чави, Снајдер,
Кристијано Роналдо, Меси и Виља.
Прв пат е избран женски тренер на годината, во прашање е Силвија Нејд, предводничката на Германките кои доминираат во светскиот фудбал. Најдобрата фудбалерка доаѓа од Бразил, во прашање е Марта која ова признание го доби по петти пат.
Наградата за фер плеј го доби женскиот фудбалски тим на Хаити, за своето храбро однесување за време на катастрофата во нивната земја.
Претседателската награда замина за Дезмонд Туту, за неговиот допринос при организацијата на Мундијалот во Јужна Африка.
Гол на годината е фантастичниот погодок на Хамит Алтинтоп против Казахстан.