Репрезентацијата на Парагвај е вториот финалист на годинашново издание на „Копа Америка“ откако рано утрово по македонско време во Мендоза ја совлада Венецуела по изведувањето на пенали – 5:3.
По 120 минути натпреварот заврши 0:0, а Парагвај по вторпат откако и Бразил во четвртфиналето го совлада на пенали стигна до триумф од белата точка. Во серијата удари од 11 метри голманот на Парагвај Жусто Виљар во третата серија го одбрани ударот на Франклин Лукена што беше решавачко бидејќи сите пет изведувачи за Парагвај беа прецизни, а последниот го реализираше Дарион Верон.
Венецуела пропушти да се пласира во финалето што ќе беше нивни најголем успех иако и пласманот во полуфиналето е најдобриот резултат на оваа селекција на ова натпреварување. Во текот на натпреварот фудбалерите на Венецуела во неколку наврати ја погодија рамката на голот на Виљар, а им беше поништен и еден гол.
Финалето на јужно-американскиот фудбалски шампионат што се игра во Аргентина меѓу Уругвај и Парагвај е закажано за в недела на 24 јули во Буенос Аирес. Дуелот за 3.место меѓу Перу и Венецуела ќе се одигра ден порано во Ла Плата.