Ереван, 7 октомври 2011 (МИА) - Убедлив пораз доживеа македонската фудбалска репрезентација на гостувањето кај Ерменија во Ереван во натпреварот од 9.коло од Б групата од квалификациите за Европското првенство.
Домаќините со триумфот од 4:1 (2:0 полувреме) и ги задржаа шансите за пласман на ЕУРО 2012 година во Полска и во Украина.
Головите ги постигнаа Маркос Пицели во 28.минута за водство од 1:0. На 2:0 зголеми Хенрик Михитарјан во 34.минута, третиот гол за Ерменија беше дело на Георг Газарјан во 69.минута. Почесниот гол за Македонија во 86 минута го постигна Ванче Шиков, а конечните 4:1 во судиското надополнување на вториот дел ги постави Артур Саркисов.
Нашата репрезентација од 53.минута играше со играч помалку откако капитенот Величе Шумуликоски доби црвен картон.
Покрај овој натпревар од групата Б вечерва се играат натпреварите: Словачка – Русија и Андора – Република Ирска.
По некомплетното 9.коло на чело на табелата се: Ерменија со 17 бодови (од 9 натпревари) и Русија 17 (8), следуваат Република Ирска 15 (8), Словачка 14 (8), Македонија 7 (9) и Андора 0 (8).
Македонија следниот воедно и последен натпревар од квалификациите го игра на 11.октомври во Скопје против Словачка.