Селекторот на македонската фудбалска репрезентација за играчи до 21 година, Бобан Бабунски најави офанзивна игра и освојување нови бодови на следните два натпревари во квалификациите за Европското првенство, против Фарските Острови и против Данска.
- Овој квалификациски циклус го почнавме со идеја на првите три натпревари на домашен терен да направиме добри резултати и со добро бодовно салдо да ги продолжиме квалификациите на гостински терен. Фарски Острови се аутсајдери во нашата група, но во никој случај не треба да ги потцениме, бидејќи во последниве години се во подем. За разлика од нив Данска е фаворит за висок пласман, има компактна репрезентација и ја карактеризира игра со многу додавања. За постигнување на нашата цел ќе мора да одиграме на високо ниво и играчите да го прикажат квалитетот со кој располагаат, изјави Бабунски на денешната прес-конференција.
Тој ги информираше новинарите дека на располагање ги има сите повикани репрезентативци, а еден од најдобрите млади македонски фудбалери, Ферхан Хасани во договор со селекторот на „А“ репрезентацијата Џон Тошак, по одработување на неколку тренинзи во првата селекција, на У-21 составот ќе му се приклучи в сабота и е во план да игра против Данска.
Натпреварот Македонија - Фарски Острови ќе се одигра в петок, а Македонија - Данска во вторник на 8 ноември. Двата натпревари ќе се играат на стадионот „Борис Трајковски“ во Скопје со почеток од 13 часот.
Табела во групата „4“: Србија 8 бодови (4 одиграни натпревари), Данска 7 (3), Северна Ирска 4 (4), Македонија 1 (1), Фарски Острови 1 (4).