Македонскиот репрезентативец Горан Пандев, како што пренесоа италијанските медиуми, остро реагирал кон својот тренер Валтер Мацари незадоволен од неговата смена во 62. минута на дуелот против Аталанта, кој на крајот заврши без победник 1:1.
Пандев и Мацари, според италијанските медиуми, размениле неколку невкусни зборови по замената при што на коментарот на Мацари: "Зошто реагираш кога не играш како треба на теренот?, нашиот интернациоаналец му возвратил со: "Губи се...".
По натпреварот тренерот на Наполи прашан за "судирот" со Пандев истакна дека можеби погрешил поради што и треба да му се извини на нашиот фудбалер.
"Пандев можеби со право беше лут. Се трудеше максимално на теренот, па можеби требаше да одигра уште десет минути. Но, во тие моменти помислив дека Лавеци ќе го засили нашиот ритам затоа што Пандев и не е доволно физички подготвен. Сите ние сакаме Горан да биде што подобро подготвен и да игра цел натпревар", изјави Мацари.
А, веднаш по замената на Пандев Аталанта преку Денис во 64. минута дојде до водство од 1:0. Бодото на Наполи го донесе Кавани во последната минута од судиското продолжение.