На конференцијата за медиумите во пресрет на "класико" наместо тренерот на Реал, Жозе Мурињо се појави неговиот помошник Ајтор Каранка, кој најави дека Португалецот нема да се откаже од формацијата 4-3-3 иако претходно се случуваше токму за мечот против Каталонците контроверзниот стратег да ја промени тактиката.
-Ќе играме во систем 4-3-3, а во нападот ќе играат Ди Марија, Роналдо и Игуаин или Бензема, во средниот ред сигурен е само Алонсо, додека пред него би можеле да се најдат Кака и Езил или Дијара и Кедира. Сакаме да ја играме нашата игра и не не интересира кој ни е противник, а тоа го докажавме и во Амстердам, каде игравме во полна пареа, иако веќе го имавме обезбедено првото место во групата. Се наоѓаме во одлична форма и нема да подготвуваме никаква посебна тактика за Барселона- изјави Каранка.