Македонската фудбалска репрезентација на 26 мај ќе игра контролен пријателски натпревар со репрезентацијата на Португалија. Натпреварот според првичниот договор ќе се игра во Лисабон.
Македонскиот селектор Џон Тошак посакуваше во мајскиот термин за пријателски натпревари да добие силен противник и тоа му се оствари. Македонија ќе има можност против моментно шестата светска фудбалска сила да покаже дали подготвена ќе ги дочека квалификациите за Мундијалот, а за португалските фудбалери овој дуел ќе биде шанса за проверка на формата пред настапот на еврошампионатот во Полска и во Украина.
Според Игор Климпер, генералниот секретар на ФФМ договорени се сите детали околу гостувањето на македонските репрезентативци во Лисабон и останува само формалното потпишување на договорот.
Климпер најави уште еден до два пријателски натпревари за македонската репрезентација во периодот пред почетокот на ЕП кое од 8 јуни до 1 јули годинава ќе се одржи во Полска и во Украина.