Македонскиот репрезентативец Горан Попов ќе треба добро да се потруди за да добие статус на првотимец во составот на англискиот премиерлигаш Вест Бромвич Албион. Како што изјави за британските медиуми менаџерот на ВБА, Стив Кларк, нашиот фудбалер, кој непосредно пред репрезентативните активности се договори со Англичаните, од клупата ќе чека шанса за настап во новиот дрес.
"Прва опција на позицијата лев бек се’ уште е Лајам Ричвел. Попов апсолутно е свесен за тоа. Знае дека доаѓа во клубот каде што мора силно да се бори за да добие место во тимот. И против Фулам овој викенд извесно е дека дуелот ќе го почне од клупата", вели Кларк, според кого во секој случај зголемената конкуренција може да донесе само позитивни вредности во неговиот тим.
"Конкуренцијата за секоја позиција во тимот сигурно е добредојдена за нас. Тоа само може да придонесе фудбалерите многу повеќе да даваат на натпреварите. Во секој случај, сезоната е долга, па ќе има доволно можности секој да ги покаже своите квалитети", вели Кларк.
Горан Попов нареднава сезона ќе ја мине на позајмица во ВБА откако во последниот ден од преодниот рок се договори за ослободување од редовите на Динамо Киев.