Италијанскиот репрезентативец Марио Балотели одби да го земе дресот со бројот 9 и во Милан ќе го носи 45, број кој му стана омилен додека настапуваше во Манчестер Сити. Иако по заминувањето на Алесандре Пато деветката во Милан е слободна, напаѓачот реши да не го носи дресот кој најчесто го носат класичните напаѓачи, а низ историјата на клубот тој број го носеле Марко ван Бастен, Жорж Веа и Филипо Инѕаги. Балотели го носеше дресот со бројот 9 додека играше за Интер, а и минатото лето на својот грб го имаше тој број додека настапуваше во дресот на "аѕурите" на европското првенство во Полска и Украина. Пред три години Балотели во кафуле во Милано се сликаше со дресот на Милан на кој стоеше бројот 45.
Милан веќе почна да продава дресови со името на Балотели. Навивачите на "росонерите" треба да платат по 39 евра ако сакаат да имаат дрес од новиот миленик на клубот. Балотели уште како дете бил симпатизер на Милан, но кариерата ја почна во големиот градски ривал Интер. Откако три години помина во Интер, Балотели се пресели во Манчестер Сити, каде помина две и пол сезони. "Граѓаните" за трансферот на Балотели ќе добијат 20 милиони евра, а голгетерот со новиот договор се обврза да остане на "Сан Сиро" до 2017 година. Балотели во нападот ќе игра заедно со Стефан ел Шарафи, кој му посака добродојде на новиот соиграч.
"Добредојде Марио. Многу сум среќен што доаѓаш во нашиот тим", напиша Ел Шарави на социјалната мрежа "Твитер".