Капитенот на македонската фудбалска репрезентација, Горан Пандев ја обвини ФИФА за малверзација на гласовите за избор на најдобар фудбалски тренер.
Напаѓачот на Наполи, објасни за италијанските медиуми дека во изборот за најдобар тренер, тој гласал за поранешниот тренер од Интер, Жозе Мурињо, а не за Винсенте дел Боске како што беше соопштено. Оваа изјава од Пандев доаѓа само еден ден по обвинувањата на Мурињо дека ова доделување на наградата е наместено.
-Гласав за Мурињо и знам дека некои чудни работи се случуваа за време на гласањето. Според ФИФА мојот глас го доби Дел Боске, но јас гласав за Мурињо. Дури им се јавив за да им укажам на грешката, но за жал чудни работи се случуваат и во ФИФА.
Зборовите на Мурињо и изјавата на Пандев покренаа лавина од коментари, а според спортските медиуми проблеми при гласањето имал и селекторот на Габон, Карлос Дуарте.