Украинската фудбалска репрезентација е следниот предизвик за Македонија во квалификациите за пласман на Европското првенство 2016. Не се тоа што беа, но Украина секогаш има добри играчи и два големи клуба кои редовно играат во Лигата на шампионите. Шахтјор, Динамо и во поново време и Днипро произведуваат големи имиња на украинскиот фудбал, а оваа генерација е кадарна да го понесе тимот кон Европскиот шампионат.
Сепак, нешто друго ги мачи Украинците, па не им е многу до фудбал во овие мигови. Целата нација е насочена само кон случувањата блиску границата до Русија, но полека се консолидираат и почнаа да победуваат. По шокот од Словачка дома, следуваше победа среде Белорусија.
Македонија пред себе има тешко гостување. А како и не би било кога за нас сите гостувања се тешки, со оглед дека на нив играме слабо, сме надиграни, а особено од тие земји кои се со среден фудбалски квалитет. Згора на тоа нашата репрезентација има и мала смена на генерација, па сега некои нови момци како Трајковски, Адеми, Абдурахими, Ибраими, Јаховиќ... треба да ја понесат селекцијата кон тој толку долго очекуван успех.