Македонската кошаркарска репрезентација со подмладен состав попладнево во Каунас (Литванија), ќе го одигра првиот од двата контролни натпревари во рамките на подготовките за Олимпискиот квалификациски турнир во Каракас (Венецуела). Противник на Македонија ќе биде репрезентацијата на Русија.
Без Перо Антиќ, Тодор Гечевски, Влатко Илиевски и Лестер Бо Мекејлеб, селекторот Марјан Лазовски на овие контролни натпревари ќе има можност да ги провери квалитетите на неколкумина дебитанти, како Стојан Ѓуровски, Тод Зафировски, но и 15-годишниот Кристијан Николов.
Покрај нив во Канунас отпатуваа и: Александар Костовски, Маркиз Грин, Дарко Соколов, Марко Симоновски, браќата Војдан и Дамјан Стојановски и триото центри Ѓорги Чековски, Кирил Николовски и Предраг Самарџиски.
Почетокот на натпреварот Македонија – Русија е во 17 часот и 30 минути, а два дена подоцна (в сабота) македонските кошаркари ќе одиграат контролен натпревар и со Литванија.
Токму селекциите на Русија и Литванија, се едни од главните конкуренти за трите места на турнирот во Каракас, преку кои се обезбедува пласман на Олимписките игри во Лондон.
Во Каракас на турнирот од 2 до 8 јули ќе учествуваат 12 репрезентации. Македонија во првата (групна) фаза ќе игра против Нов Зеланд и Ангола.