Македонската кошаркарска репрезентација на гостински терен во Клаипеда ја победи репрезентацијата на Литванија со резултат 78-74 во вториот контролен натпревар пред квалификациониот турнир во Каракас за пласман на ЛОИ во Лондон.
Војдан Стојановски и Предраг Самарџиски беа кошаркарите кои со одличната игра се истакнаа на паркетот, а во тимот на Марјан Лазовски, недостасуваа Антиќ, Гечевски, Мекејлеб и Илиевски. Војдан Стојановски беше најефикасен во нашиот состав со 23 коша, додека пак Предраг Самарџиски го заврши натпреварот со постигнати 19 коша.
Ова беше второ соочување на Македонија со Литванија по натпреварот од Евробаскетот во 2011 година, кога во Вилнус, Владо Илиевски ги шокираше домаќините со тројката во последните секунди и Македонија успеа да се пласира во четврт-финале.
Во првиот натпревар од мини контролната турнеја на во Литванија, Македонија загуби од Русија со резултат 61-80.