Репрезентацијата на Србија е првата која обезбеди пласман во полуфиналето на Светското првенство во одбојка кое се одржува во Италија.
Србите во Фиренца, во рамките од 2.коло на четвртфиналната група „П“, ја совладаа селекцијата на Русија со 3:1 (28:26; 17:25; 25:21; 27:25) во сетови. За Србија ова беше втора победа во групата со која го обезбеди првото место, а со тоа и пласман во полуфиналето на СП, па денешниот натпревар меѓу Русија и Аргентина ќе одлучи која од овие две селекции ќе се бори за пласман од петто до осмо место, а која од деветто до 12.место.
Неизвесен натпревар во Рим одиграа домаќинот на шампионатот Италија и селекцијата на САД. Со победата од 3:1 во сетови (14:25; 25:23; 25:21; 27:25) Италија ги задржа шансите за полуфинале, а со тоа и амбициите за златниот медал. Денес во рамките на групата „О“ во борбата за првото место играат Франција и Италија.
Слична е ситуацијата и во преостанатите две групи.
Откако синоќа во групата „С“ Куба ја победи Шпанија со 3:1 (25:22; 15:25; 25:22; 25:22), денес Кубанците во меѓусебен дуел со Бугарија решаваат за првото место во групата.
Во последната четвртфинална група „Р“, Германија синоќа славеше победа над Чешка со максимални 3:0 (25:23; 25:18; 25:13). Германците за место меѓу четирите најдобри на Мундијалот денеска ќе се борат со Бразил.