Скопје, 19 октомври 2010 (МИА) - Актуелниот тренер на ракометниот клуб Пелистер Ѕвонко Шундовски е назначен за вршител на должноста селектор на ракометната репрезентација на Македонија.
Само неколку часа по оставката на Љубомир Савевски раководните луѓе на Ракометната федерација во договор со членовите на Управниот одбор, одлучија Шундовски да продолжи со подготовките на репрезентацијата и да го предводи националниот тим на натпреварите во квалификациите со Естонија и со Босна и Херцеговина на крајот од месецов.
Ѕвонко Шундовски беше тренер на репрезентацијата на Светското првенство во Хрватска во 2009 година кога селектор беше Илија Темелковски.
Се очекува тренерот на Пелистер од Битола попладнево да пристигне во Скопје и да го води вечерашниот тренинг на репрезентацијата на Македонија кој е закажан за 17 часот и 30 минути.
Македонските репрезентативци утре во 7 часот треба да заминат за Романија каде ќе настапат на турнирот „Трофеј Карпати“ кој претставува последен тест за формата пред почетокот на квалификациите за Европското првенство 2012 година во Србија.