Ракометната репрезентација на Македонија ја совлада Естонија со 30:25 во првото коло од новиот квалификациски циклус за Европското првенство што во 2012 година ќе се одржи во Србија.
Пред околу илјада и петстотини гледачи во салата „Кале“ во Скопје победникот беше решен уште по првите 15 минути кога Македонија создаде разлика од пет голови, а на полувремето се отиде со резултат 16:10.
Вторите 30 минута македонските ракометари ги одиграа рутинирано со желба да ја одржат предноста и да ги зачуваат силите за следниот дуел. По највисоките девет голови разлика – 24:15, во последната четвртина од мечот в.д. селекторот Ѕвонко Шундовски во игра го стави резервниот состав кој ја одржа предноста до крајот на мечот.
Денес се игра вториот натпревар од групата 1 меѓу Унгарија и Босна и Херцеговина.
Следниот натпревар Македонија го игра во Сараево против Босна и Херцеговина в недела со почеток од 20 часот.