Предводени од германскиот интернационалец Дирк Новицки, кој 10 од своите 21 поен ги постигна во последниот период, кошаркарите на Далас изедначија на 2-2 во добиени натпревари во финалето на НБА лигата против Мајами.
Во „Американ Ерлајнс Центарот“ во Далас пред 20 илјади гледачи рано утрово по македонско време финалистите одиграа уште еден неизвесен натпревар, со 15 изедначувања и 12 промени на водството. За разлика од претходните дуели кај Далас покрај Новицки расположени беа и Тајсон Чандлер со 13 поени и 16 скокови и Џејсон Тери со 17 поени.
„Жешките“ од Мајами на четвртиот натпревар имаа само двајца расположени играчи – Двејн Вејд со 32 поена и Крис Бош со 24, додека Леброн Џејмс остана на само 8 и со тоа ја прекина серијата од 434 натпревари на кои постигнувал двоцифрен број поени.
Натпреварот број 5 се игра в четврток во Далас, а со сигурност се знае дека серијата ќе продолжи и во Мајами.