Македонскиот ракометен шампион Металург, в сабота ќе го одигра првиот натпревар од Лигата на шампионите. На отворањето на новата сезона во најквалитетното натпреварување Металург го пречекува шампионот на Словенија, Цимос Копер.
- Чест е да се игра во Лигата на шампионите. Не можеме да ветиме дека ќе победиме, но имаме право да се бориме со секој противник и на секој натпревар ќе дадеме се од себе. Имаме право позитивно да размислуваме и тоа ќе не донесе до успех. Патот до победата е ако веруваме и ако одиграме дисциплинирано и тактички мудро, а пред се треба да одиграме добро во одбраната, истакна Лино Червар тренерот на Металург на денешната прес-конференција.
Поради повреда на овој натпревар нема да игра Миладин Козлина, додека Дамир Батиновиќ е неизвесно колку ќе може да игра. Позитивно за македонскиот шампион е што за натпреварот е подготвен Наумче Мојсоски.
Капитенот Ванчо Димовски му ја пропушти на противникот фаворитската улога.
- Ќе ја препуштиме улогата на фаворит на противникот, меѓутоа и тие се екипа која нема големо искуство во Лигата на шампионите и добро е со победа да ја отвориме Лигата на шампионите. Фаворит во нашата група е екипата на Хамбург од Германија, а сите други тимови имаа исти шанси за првите четири места.
Натпреварот Металург - Цимос Копер се игра в сабота во 18 часот во СЦ „Борис Трајковски“.
Во рамките на „Ц“ групата вечерва играат Хамбург и Санкт Петерсбург, додека во третиот натпревар од оваа група, в сабота играат Висла и Констанца.
Новата 19-та по ред сезона од Лигата на шампионите стартува вечерва со дуелот од 18 часот во Загреб меѓу Кроација Осигурање Загреб и Савехоф.