Македонскиот ракометен првак Металург одигра нерешено 25:25 (10:11) на гостувањето во Санкт Петерсбург, со истоимената домашна екипа во рамките на второто коло од Ц групата од Лигата на шампионите.
Во поголемиот дел од натпреварот Металург се наоѓаше во водство, а во три наврати имаше и четири голови предност, но екипата на Санкт Петерсбург успеа со серија од 5:0 да направи пресврт и во финишот на натпреварот да има минимално водство.
Во последните минути играчите на Металург успеаја да ги корегираат грешките и со голот на Жарко Марковиќ на десет секунди до крајот и да изедначат на 25:25 што беше конечен резултат.
Во екипата на Металург Марковиќ и Наумче Мојсоски постигнаа по 7 голови, а Дарко Станиќ имаше 17 одбрани. Најефикасен на натпреварот беше Алексеј Шиндин со 9 голови.
На другите два натпревара од Ц групата: Констанца - Хамбург 26:34 и Цимос Копер - Висла 27:24.
На табелата води Хамбург со 4 бодови, пред Металург со 3, Цимос Копер и Висла имаат по 2, Санкт Петерсбург 1, а Констанца е последна без бод.
Металург следниот натпревар го игра в недела на 16.октомври против Хамбург на гости.