Еден од најдобрите ракометари во репрезентацијата, Наумче Мојсовски, во интервју за EHF објасни дека атмосферата од многубројните навивачи во салата Чаир е мотивација и притисок за тимот.
-Навивачите се како осми играч за нас. Но, и покрај нивната поддршка, тие вршат голем притисок врз нас, затоа што очекуваат големи нешта. Ние сме мала држава на која ова и е само второ учество на Европско првенство. Фановите ни помагаат, но очекувањата се многу големи, објасни Мојсовски за притисокот кој го чувствуваат ракометарите.
За среќа Македонија ја победи Чешка со резултат 27-21 и обезбеди понатамошно учество на Европското првенство во Србија. Следни противници на Македонија во Белград ќе бидат Данска, Полска и домаќинот Србија.
Официјалната EHF интернет страница исто така по натпреварот со Чешка објави дека во салата биле измерени речиси 100 децибели од грлата на македонските навивачи. Поддршката од навивачите ќе продолжи и во Белград.