Ниш е епизода која ќе остане запаметена од сите актери. По својата специфичност, по црвено-жолтата боја на трибините, по првата победа на Македонија на ЕП.
Денеска почнува ново поглавје. Илузорно е да се очекува дека дваесетилјадната "Арена" ќе изгледа како нишкиот "Чаир", но заинтересираноста меѓу македонските фанови нагло се зголеми и "Фаланга" сигурно нема да биде малубројна во белградската убавица.
По сето видено во Ниш, препорака до македонските фанови е овој пат да се потрудат навреме да си набават билети. Во Ниш за натпреварот со Чешка цената на билет достигаше и до 70 евра, но и таквите беа реткост. Уште една препорака е да се купуваат билети од проверени агенции за да не им се случи "прикаската" на 50 навивачи од "стара гарда Комити" кои преку една "таква" агенција имаа платено и сместување во хотел во пакет со билети и кога пристигнаа во Ниш им беше кажано дека билети - нема!