Капитенот на македонската ракометна репрезентација Кирил Лазаров по поразот од Португалија вчеравечер на гостувањето во градот Еспињо, на својата веб страна го пренесе разочарувањето на сите репрезентативци од играта и од резултатот.
- Го одигравме можеби најслабиот натпревар во последните години. Тоа што ни се случи со Швајцарија, ни се повтори и овде во Еспињо. Големи падови во играта не се дозволени за една амбициозна репрезентација. Тоа противникот го казнува експресно. Можеби занесени од добрата играта и огромната гол разлика со Швајцарија, подсвесно помисливме дека сме многу силни и покрај проблемите со кои се соочувавме во претходните денови, изјави Лазаров.
Сепак, македонскиот капитен е оптимист околу пласманот на репрезентацијата на Европското првенство во Данска.
- Од овие работи можат да се научат големи поуки. Затоа што ништо не е загубено. Се’уште ние сме големи фаворити за пласман во Данска. На грешките се учи. Ја загубивме „битката“, но не и „војната“ заврши Лазаров.