Се бројат часовите до следната голема пресметка во Лигата на шампионите на ЕХФ која ќе се одржи во Скопје. В недела, во "Борис Трајковски" силите ќе ги одмеруваат двата непоразени тима од групата "Ц", македонскиот Металург и полскиот Киелце.
Ова ќе биде (дво) меч за прво место во групата кое носи дуел со најслабите учесници во Топ 16. Следната сабота се игра и возвратниот натпревар, по што ќе се знае која екипа ќе ја има предноста во продолжението на елитното натпреварување.
На стартот на сезоната за Металург и самиот пласман во Топ 16 ќе беше повторување на историскиот успех, воедно и најдобар пласман на македонска екипа во ова натпреварување, но работите се изменија и сега се атакува не само на Топ 16 туку и на првото место во групата.
Киелце е екипа која е слична на Металург. Само што многу побрзо оди по патеките на успехот отколку македонскиот тим. Парите ја имаат овде главната улога. Имаат неколкупати поголем буџет, неофицијалните информации се дека располагаат со околу 6.000.000 евра, што е многу блиску до екипи како Рајн Некар, Хамбург итн. Реално, веројатно имаат помалку пари од цифрата која се споменува, но и натаму сигурно имаат најмалку трипати поголем буџет од металурговиот. Географската близина со Германија, тоа што се во ЕУ пак, им овозможува многу полесно да дојдат до квалитетни играчи итн.
Брза експанзија, посебно на тим кој игра во слаба домашна лига, остава празнини во играта. Тоа најпросто се објаснува со во пракса докажаното правило дека екипата не си ги знае своите слаби страни. Иако беа импресивни и во Лигата на шампионите досега, сепак, не се судриле со тим каков што е Металург. Висла Плок е нешто најблиску до тоа, а таа средба ја загубија со 7 гола разлика.
Киелце во Скопје ќе има предност што не мора да победи. Тие за седум дена ќе го добијат товарот кој се носи на домашен терен. Овде ќе бидат релаксирани барем до извесен степен. Од руга страна на Металург му е битно само да победи и тоа практично ја поништува психолошката предност на гостите.
Киелце е опасен тим, многу поопасен од Висла која лани лесно беше надиграна и поразена во Скопје. Киелце годинава ги доведе двете хрватски крила Мануел Штрлек и Иван Чупиќ и тоа ги прави исклучително опасни. Тоа се два играчи кои шутираат (и погодуваат) од позиција, се "креваат" на шут и од самиот агол и мора постојано да се внимава на нив. Така ја развлекуваат противничката одбрана и им оставаа простор на бековите кои ако сакаат, шутираат и од 12 метри.