Припадници на специјалната единица на француската полиција ќе одат на Зимските олимписки игри во Сочи заедно со француските спортисти за да се грижат за нивната безбедност, соопшти министерката за спорт на Франција Валери Фурнејрон.
- Направивме се за да ја зголемиме безбедноста на нашите спортисти и гледачи. Специјалните единици на француските безбедносни сили ќе бидат со нашите спортисти, изјави Фурнејрон за „Паризиен“ и додаде дека ќе присуствува на свечената церемонија на отворањето на Игрите во Сочи закажана за 7 февруари.
Преземените превентивни мерки од страна на француската министерка за спорт се реакција на заканите од исламистичката група од Северен Кавказ која во понеделникот објави видео во кое најавува напади за време на одржување на Олимпијадата. Оваа група ја презема одговорноста за терористичките напади во Волгоград во кои загинаа 34 лица.