Женската репрезентација на Македонија ги почна подготовките за натпреварите со Италија, закажани за в четврток во Скопје (17:45) и в недела во Фолоника (18:30). Во групата од која само провопласираната репрезентација обезбедува место во баражот за СП е уште и репрезентацијата на Исланд со која ќе играме на почетокот на декември.
Македонскиот тим денеска ќе се комплетира. Последна доаѓа Елена Георгиевска, која во неделата имаше одличен настап на дербито Баја Маре – Букурешт, каде со четири гола помогна во победата на својот тим.
Селекторот Магдинчев е задоволен од тоа што во моментов го има на располагање.
„Се чувствува разлика кај играчите споредбено со претходниот циклус. Најголемиот дел од нив имаат ангажман во странство, градат поинакви кариери и генерално се задоволни, а тоа е многу битно за амбиентот во екипата“, вели Магдинчев истакнувајќи дека во добра форма се Штериова, Саздовски, Десподовска итн.
Италија е противник кој ќе покаже колку Македонија по смената на генерацијата отишла надолу и какви се нашите шанси преку Исланд да стигнеме до бараж. Претходните квалификации не можеа да дадат реална слика затоа што противници ни беа Русија и Германија, екипи со кои не сме излегувале на крај и кога сме имале најсилен тим.