Ракометарките на ЖРК Вардар со победата над германскиот тим Лајпциг, направија чекор поблиску кон четвртфиналето во Лигата на шампионките.
На средбата од 4.коло во групата „1“ одигран вечерва во СЦ „Јане Сандански’’ избраничките на Индира Кастратовиќ, го совладаа тимот на Лајпциг со 26:20.
Првото полувреме мина во рамноправна игра во која двете екипи имаа свој период на добра игра. Сепак гостинскиот чувар на мрежата Катја Шулке со осум одбрани ја одржуваше екипата на Лајпциг во игра, не дозволувајќи им на нашите шампионки да остварат посериозна гол предност, па на паузата се замина со минимално водство на вардарки од 10:9
Во вториот дел на сцена стапи Ина Суслона која со вкупно 17 одбрани, беше една од најзаслужните за триумфот на вардарки, во кој Ања Алтхаус беше најефикасна со 6 голови, додека Алена Икхнева и Јулија Николиќ придодадоа по 5.
Во оваа група утре се играат натпреварите, Турингер - Крим Меркатор и Будуќност - Динамо Волгоград.
Табела: Будуќност 13 бодови, Динамо Волгоград 10, ЖРК Вардар 7, Турингер 6, Лајпциг 6 и Крим Меркатор 2.
Во групата „2“ денеска се одигра средбата Ларвик – Ѓер во која домашната екипа славеше победа со 22:19, а утре се среќаваат, Мец – Виборг и Баја Маре – Савенхоф.
Табела: Ларвик 16 бодови, Ѓер 12, Виборг 5, Мец 4, Баја Маре 4 и Савенхоф 3.