Плок, 15 март 2015 (МИА) - Тренерот на Вардар, Раул Гонзалез на прес конференцијата по натпреварот со Висла потенцираше дека главната причина за високиот пораз се многуте грешки што ги направија неговите играчи.
- Честитки за Маноло добро го подготвил натпреварот. Ние во првите 15 минути игравме одлично, но потоа имавме проблеми со високата одбрана на Висла. Направивме многу грешки во нападот и тоа нѐ чинеше пораз, изјави Гонзалез.
Шпанскиот репрезентативец во дресот на Вардар, Алекс Душебаев, постигна 10 гола, одигрувајќи еден од најдобрите натпревари откако е меѓу „црвено-црните“. Тој го постигна и последниот гол, со звукот на сирената намалувајќи го резултатот на минус шест гола.
- Висла играше подобро од нас и тоа го покажува разликата од шест гола. Во првото полувеме ние не игравме лошо, но во второто полувреме противникот беше многу поквалитетен. Беше одлична во сите елементи и во одбрана и во нападот, голманите им беа расположени, а беа и ефикасни во контранапад. Ова е навистина голема разлика, меѓутоа ќе се подготвиме одлично за да бидеме подобри следната недела, кога е реваншот во Скопје, изјави Душебаев.
Првиот натпревар од осминафиналната пресметка во ракометната Лига на шампиони меѓу Висла и Вардар синоќа во Плок заврши со победа на полскиот претставник со резултат 32:26. Реваншот е идната сабота во Скопје.