Високите потпетици се последниот моден додаток на модните жртви кои сакаат нивните деца да бидат трендовски облечени.
Малите дизајнерски чевли се достапни во повеќе бои и дезени, почнувајќи од светло розова па се до тигреста.
Високи потпетици, кои се дело на американската компанија „Heelarious“ се наменети за девојчињата кои веќе навршиле шест месеци.
„Смешните високи потпетици се забавни, смешни, но воедно и гламурозни. Тие се одличен моден додаток за вашата ќерка. Многу мајки сметаат дека се опасни, но откако ќе ги видат и пробаат, сфаќаат дека се меки и удобни“, велат од „Heelarious“, истакнувајќи дека не им создаваат проблеми на бебешките нозе бидејќи се изработени од мек и нежен материјал.
Сепак бебешките високи потпетици создадоа полемики во модниот свет.
„Повеќето родители сметаат дека високите потпетици се несоодветни за нивното дете, пред се поради фактот што се изработени од материјал од кој се прават чевлите за возрасни“, смета Илејн Грифитс, уредничка на магазинот „Prima Baby“.
„Иако девојчињата уште од најмала возраст ги облекуваат високите потпетици на своите мајки, сепак невкусно е да носат штикли пред да научат нормално да одат. Веројатно повеќето родители би сакале нивните ќеркички да бидат слатки и невини додека можат, наместо да ги облекуваат како возрасни уште од првите месеци на нивниот живот. Сметам дека ќе има доволно време за високи потпетици кога ќе станат адолесценти“, смета Ерика Дејвис, уредник на моден магазин за возрасни.