Дали некогаш се чувствувате раздразливо и вознемирено и тоа без очигледна причина? Состојбата во која што се наоѓате можеби има врска со вашата исхрана.
Истражувањата покажуваат дека она што го јадеме влијае не само на нашето физичко здравје, туку и на нашето ментално здравје.
Одредени намирници и пијалаци што ги консумираме ни даваат енергија, додека други прават да се чувствуваме тромо, нерасположено, а понекогаш дури и луто. Истражувањата покажуваат дека еден вид храна може да предизвика чувство на лутина и да поттикне стрес, а тоа е онаа која има висока содржина на трансмасти.
Студијата објавена во „PLOS One“ покажува поврзаност помеѓу консумацијата на трансмасни киселини и „раздразливоста и агресивноста во однесувањето“. За потребите на студијата, истражувачите ги анализирале навиките за исхрана и однесувањето на 945 возрасни мажи и жени. Вклучувајќи ги сите важни фактори (пол, возраст, образование, консумирање алкохол и цигари), тие заклучиле дека постои јасна поврзаност помеѓу консумацијата на трансмасти и зголемената агресија во однесувањето.
Трансмастите се сметаат за најопасни масти бидејќи го зголемуваат холестеролот, а како последица на тоа, го зголемуваат и ризикот од срцеви заболувања. Овие масти го зголемуваат нивото на LDL, односно „лошиот“ холестерол, а во исто време го намалуваат нивото на „добриот“ (HDL), претворајќи го во штетни масни киселини.
Најголемите извори на трансмасти се растителните масла кои се широко користени во брзата храна, готовите оброци, пржената храна и пекарските производи. Исто така, огромни количини од нив има во помфритот, чипсот, пржена храна, пржени колачи, замените за сирење и маргаринот.