Кејт Мидлтон се најде на насловните страни на светските магазини поради тоа што и роди син наследник на британската монархија, но она што ја направи уште позначајна за женската популација е нејзината постпородилна фигура која предизвика вистинска лавина од коментари.
Зошто Кејт го шокираше светот со својата појава? Затоа што реши да биде она од што се плашат современите мајки. Таа реши да биде сосема нормална жена, која се породи на природен начин и по породувањето без никаков проблем го покажа своето топчесто стомаче. За разлика од многу славни жени кои по раѓањето на своето дете не излегуваат од дома додека не ја вратат првичната тежина, Кејт се оттргна од наметнатиот идеал за совршенство и наместо подвижна барбика, пред сè реши да биде мајка.
Во време кога акцентот на жените повеќе е ставен на нивниот изглед отколку на нивната личност, многу припаднички на понежниот пол паѓаат во замката и под притисокот секогаш да изгледаат беспрекорно и слабо. Носители на ваквиот тренд се светски познатите актерки, модели и пејачки кои наместо да ја искористат моќта на својата слава и да му се спротивстават на трендот дополнително го промовираат. Викторија Бекам, Жизел, Бијонсе и ред други ѕвезди по своето породување не се појавуваа во јавноста додека не ја вратат првичната телесна тежина и рамното стомаче. За разлика од нив, Мидлтон се појави пред фотографите ден откако се породи и наместо да се крие избра креација која дополнително ја нагласи нејзината половина.
Принцезата која и покрај големиот медиумски интерес секогаш се обидува да изгледа одмерено и скромно и овој пат продолжи во својот препознатлив стил не обрнувајќи внимание на тоа што мислат другите за нејзиниот изглед, а уште помалку за нејзината постпородилна тежина.
Со тоа преку ноќ стана омилен лик на обичната жена, онаа која бременоста и породувањето ги сфаќа како најнормален дел од својот живот. Поборниците на ковчестиот изглед пак веднаш започнаа да поставуваат прашања кога ќе започне да вежба и на кој начин планира да ја врати својата витка фигура.
Сепак, војвотката од Кембриџ за сега останува глува на ваквите прашања и го поминува своето време онака како што би требало да го помине секоја мајка, со својот штотуку роден син, а не на лента за трчање и на ригорозна диета. Со оглед на тоа дека во моментот е најпознатата принцеза на светот нејзиниот став ветува дека оваа принцеза ќе биде пример и предводник на вистинската женственост и достојна замена на Лејди Ди која своевремено ги освои симпатиите на сиот свет.