Истиот момент кога почнувате да вежбате, веќе започнуваат и придобивките од вашата физичка активност.
Отчукувањата на срцето се забрзуваат и крвта се испорачува до мускулите. Телото започнува да согорува калории како гориво и веднаш се подобрува расположението.
Само 30 минути кардио вежби 3 до 5 дена во неделата може да го продолжат животот и до 6 години, а доколку на тоа додадете и вежби со отпор и тежини не само што ќе живеете подолго, туку и ќе изгледате помладо, ќе се чувствувате посреќно и ќе имате повеќе енергија.
1) За време на тренингот
Белите дробови стануваат посилни, мозокот испраќа сигнали до нив да ви помогнат да дишете побрзо и подлабоко, испорачувајќи дополнителен кислород во мускулите. Благодарение на напливот од ендорфини, се чувствувате мотивирано и енергично.
2) Еден час по тренингот
Вежбањето го зголемува нивото на имуноглобулини, протеини кои го зајакнуваат имунолошкиот систем и ги одбиваат инфекциите.
Хемикалиите кои го подобруваат расположението (серотонин, допамин и норепинефрин) го преплавуваат мозокот неколку часа, а калориите се согоруваат и за време на одмарањето.
3) Еден ден по тренингот
Мускулите почнуваат да ги обновуваат микроскопските оштетувања предизвикани од кревањето тегови, крвниот притисок е намален и до 16 часа по веќбањето, а поради зголемениот проток на крв и кислород во мозокот, повеќе сме фокусирани.
4) По една недела редовно вежбање
Се намалува ризикот од дијабетес, бидејќи колку повеќе вежбаме толку подобра е чувствителноста на инсулин.
Издржливоста се зголемува за околу 5%, па така на следните тренинзи може да се вежба подолго и со поголеми тежини од претходно.
5) По еден месец регуларно вежбање
Станувате посилни, почнуваат да се топат маснотиите во стомакот, а мозокот функционира подобро бидејќи вежбањето активира протеини кои стимулираат раст и кои помагаат за формирање на нови клетки во мозокот
6) По една година редовно вежбање
Издржливоста и кондицијата може да е зголемена и до 25%, телото е станато исклучително ефикасно во согорување на масти и користење на истите како гориво, па затоа 24/7 топите калории.
Благодарение на редовното вежбање, срцето пумпа поефикасно, ризикот од канцер е намален (и до 55% за ракот на дојки, бели дробови и јајници). Животот е продолжен за неколку години поради тоа што фитнесот ги подобрува теломерите што може да го забави процесот на стареење.