Нова студија во која учествуваа 400.000 луѓе покажува дека солта може да биде виновник за развој на дијабетес тип 2. Детали од студијата спроведена од Универзитетот Тулејн беа објавени во списанието Mayo Clinic Proceedings.
Авторите ги испитувале резултатите на 400.000 луѓе регистрирани во британската Биобанка кои биле анкетирани во врска со нивниот внес на сол, а потоа следени речиси 12 години. Меѓу таа група, 13.000 развиле дијабетес тип 2.
Кога истражувале подеталано ги анализирале учесниците кои развиле дијабетес тип 2, авторите откриле дека оние кои рекле дека „обично“ или „секогаш“ користеле сол, имале 20% и 39% поголем ризик, соодветно, да развијат дијабетес од оние кои никогаш не користеле сол. Оние кои изјавиле дека „понекогаш“ користеле сол биле изложени на 13% поголем ризик.
-Веќе знаеме дека ограничувањето на солта може да го намали ризикот од кардиоваскуларни болести и хипертензија, но оваа студија за прв пат покажува дека отстранувањето на солта од масата може да помогне да се спречи дијабетес тип 2, вели водечкиот автор Лу Чи, професор на Факултетот за јавно здравје и тропска медицина на Универзитетот Тулејн.
Чи рече дека истражувачите веруваат дека солта ги охрабрува луѓето да јадат поголеми порции, зголемувајќи ги шансите за развој на фактори на ризик како што се дебелината и воспалението. Студијата, исто така, откри врска помеѓу рутинската потрошувачка на сол и повисокиот БМИ и односот помеѓу половината и колковите.
Тој рече дека за да се потврдат наодите, треба да се спроведе клиничко испитување, да се контролира количината на сол што учесниците ја консумираат и да се набљудуваат ефектите. Во меѓувреме, јавноста треба да размисли за алтернативи со низок натриум за нивната омилена храна.
-Не е тешко да се направи промена, но може да има огромно влијание врз вашето здравје, додава Чи.