Анкара, 16 септември 2010 (МИА) - Турските државјани се уморни од празните ветувања за членство на Анкара во ЕУ и сметаат дека земјата треба повеќе да се сврти кон исламските земји на Исток, покажуваат резултатите од најновото годишно истражување на „Маршаловиот фонд“ и италијанската фондација „Компања ди Сан Паоло“.
Според истражувањето кое е спроведено во 11 земји на ЕУ, САД и Турција, само 38 отсто од Турците изјавиле дека членството во ЕУ е „добра работа“.
Според истата анкета која се спроведува веќе девет години, во 2004 година овој процент изнесувал дури 70 проценти од испитаниците.
Истражувањето покажува дека двојно се зголемил бројот на Турците кои сметаат дека Анкара за меѓународните прашања треба да соработува со земјите од Блискиот исток.
Само шест отсто од анкетираните граѓани сметаат дека главен партнер на Турција треба да биде САД. Интересно е дека е намалена и популарноста на американскиот претседател Барак Обама од 50 на 28 отсто.
- Во споредба со лани Турците помалку му веруваат на НАТО, помалку се заинтересирани за европските интеграции и вредности, се наведува во коментарот на истражувањето.
Турција веќе 10 години е кандидат за членство во Унијата, а пристапните преговори ги започна во 2005 година, но досега не постигнала некој видлив напредок во приближувањето кон ЕУ. На нејзиното членство отворено се спротивставуваат францускиот претседател Никола Саркози и германскиот канцелар Ангела Меркел и во замена и нудат „привилегирано партнерство“, но Анкара засега ваквиот предлог го отфрла.