Берлин, 1 октомври 2016 (МИА) - Германското Министерство за економија верува дека доколку републиканскиот кандидат Доналд Трамп биде избран за претседател на САД, ќе предизвика тешки последици по американската економија, објави весникот „Шпигел“.
Како што јави дописникот на МИА од Берлин, во интерен меморандум на Министерството, до кој дошол „Шпигел“, стои дека доколку Трамп како претседател ги спроведе своите предизборни ветувања, може да се очекува „драматично намалување на бруто домашниот производ, помалку работни места и повисока невработеност“ во САД.
Во кампањата за изборите, што треба да се одржат на 8 ноември, Трамп најавува даночни олеснувања вредни 4,4 билиони долари, укинување на дел од регулативата и тврди позиции во преговорите на САД за трговските договори со странските партнери.
Трамп вели дека овие мерки ќе донесат економски раст од 3,5 проценти и ќе создатат 25 милиони работни места, но со тие предвидувања не се согласуваат голем дел од американските економмисти, а според тајниот меморандум, ниту германското Министерство за економија.
Според меморандумот, чии делови објавува „Шпигел“, ветувањата на Трамп се невозможни, тие би претствувале прекршување на меѓународното и американското право и не можат да бидат основа за реална економска политика.
Германското Министерство за економија одби да го коментира написот на „Шпигел“