Берлин, 24 февруари 2011 (МИА) - Претседателот на Германија Кристијан Вулф изјави денеска дека либискиот лидер Моамер Гадафи е психички пореметен човек, кој „со сила го тероризира својот народ“.
- Тоа е државен тероризам, изјави Вулф во Берлин по средбата со неговиот италијански колега Џорџо Наполитано.
Според Вулф очигледно станува збор за дејствија „кои можат да бидат определени како психопатски“.
Наполитано од своја страна нагласи дека неговата држава не се спротивставува на можноста за воведување санкции против Либија, која е поранешна италијанска колонија.
Тој се заложи за изработка на заедничка програма на ЕУ, која ќе има за цел да ги поддржи реформите во арапските земји.