Берлин, 9 јуни 2014 (МИА) - Шефот на германската дипломатија Франк-Валтер Штајнмаер денеска изјави дека првпат во украинската криза се наѕира „светлина на крајот од тунелот“, но и предупреди дека почетокот на дијалогот на украинското и руското раководство не смее да пропадне.
- Во украинската криза по повеќе месеци првпат се гледа слаба светлина на крајот од тунелот. Иако се уште не сме ниту близу до решение на кризата, сепак, по месеци интензивни дипломатски напори, страните во конфликтот конечно разговараат една со друга, рече Штајнмаер пред утрешниот негов состанок во Санкт Петербург со шефот на руската дипломатија Сергеј Лавров и со полскиот министер за надворешни работи Радослав Сикорски.
Според Штајнмаер, дијалогот меѓу украинското и руското раководство во никој случај не смее да пропадне.
- Контакт групата, која ја сочинуваат претставници на Украина, Русија и ОБСЕ, мора да се сконцентрира на прекин на насилството и кон тоа националниот дијалог да се води на тркалезната маса, рече Штајнмаер.
Тој наведе дека во разговорите во Санкт Петербург со Лавров и Сикорски сака да се направи анализа како позитивните моменти од последните денови да се искористат процесот на деескалација да стане неповратен.