Се реновира манастирот „Св.Харалампиј“ во кочанското село Пресека

Кочани, 22 јуни 2011 (МИА) - Со финансиски средства на неколку приватни фирми и верници, во кочанското село Пресека започна реновирањето на манастирот посветен на „Св.Харалампиј“, граден во седумдесетите години на 19 век.

Овој манастир со богата историја до денес им служи на верниците од ова Осоговско село, и истиот со реновирањето ќе биде заштитен од пропаѓање. Се реконструира кровот, се поправаат конаците и се уредува околината.

Според Борис Наков, верник од Кочани, кој е и главниот иницијатор за спас на манастирот од пропаѓање, работите се одвиваат според планот, има доволно материјал, а вклученоста на бизнис заедницата е на задоволително ниво. Работите се очекува да завршат до крајот на месец август.