Скопје, 11 мај 2012 (МИА) - Заврши протестот пред Владата на Република Македониja. Демонстраните ја каменуваа владината зграда при што се искршени неколку прозорци, а ја демолираа и автобуската постојка што се наоѓа во близина. Не е регистриран директен судир со полицијата, но дел од групата се обидоа да се пресметаат со новинарските екипи.
Групата, претежно млади луѓе, протестот го почна по петочната молитва пред џамијата Јаја Паша, по што се упати кон комплексот судови, а потоа кон Владата на Република Македонија.
Извикуваа „УЧК“, „Обединета Албанија“, а на транспарентите кои ги носат пишува „Муслиманите не се терористи“, „Сопот 2“.....
Демонстрантите, кои велат дека се организирале самоиницијативно преку социјалните мрежи, на новинарите им поделија соопштение во кое се наведува дека „протестираат за навредите кон албанскиот народ со муслиманска вероисповед“. Велат дека ја споделуваат болката на семејствата на младите убиени Македонци и бараат вистинските убијци да бидат изведени пред лицето на правдата.
Тие посочуваат дека се згрозени од албанските политички партии, односно дека заменикот министер на МВР Џељал Бајрами и портпаролот на ДУИ Бујар Османи ги легитимирале навредите врз албанскиот народ.
Протести, како што јавуваат дописниците на МИА, попладнево се одржуваат и во Тетово, Куманово и Гостивар.
На тетовскиот градски плоштад се собраа околу 200 лица кои се упатија кон судот, а потоа кон седиштето на ДУИ во Мала Речица.
Во Куманово протестите почнаа во центарот на градот, продолжија кон судот, општинската зграда и полиција. Инциденти не се регистрирани.
Во Гостивар, демонстрантите носејќи исламски верски симболи и знамиња на Албанија, протестираа по улиците во центарот на градот и пред зградата на Основниот и Апелацискиот суд.
Не се регистрирани инциденти во Тетово, Куманово и Гостивар.